Langaz ki Nu Servi Tulezur

Eski Kreol Morisien enn langaz?

Buku dimun ankor ena dout lor la. La mazorite mo Kreol sorti dan Franse e kapav panse ki kikenn ki pe coz Kreol se enn dimun ki pe coz Franse mal u se zis kikenn ki pa conn coz Franse. Me kan nu get langaz Franse laplipar mo sorti dan Latin; alor eski kikenn ki coz Franse se zis enn dimun ki pa conn coz Latin? Kreol finn evolie buku depi ki li'nn ne e depi bien lontan li pe devlop san okenn depandans lor Franse. Les nu get enn ku ki dimun ena kont Kreol Morisien:

Kreol pa enn langaz

Enn langaz defini kuma enn ansambl bann mo ek manier pu servi zot ki comen dan enn mem lepep, enn mem teritwar u enn mem kiltir. Si pa vreman ena enn kiltir Morisien, Kreol satisfer de definision langaz: ou al nimport ki cote lor teritwar Moris ou coz Kreol, dimun conpran ou e reponn ou an Kreol. Sa ase pu kalifie Kreol kuma enn langaz. Tu Morisien, mem bann ki pli suvan coz lot langaz, conpran e conn coz Kreol corecteman: sa osi par li mem kalifie Kreol kuma enn langaz.

Kreol enn pidjin / enn patwa / enn dialect

Enn pidjin se enn system cominikasion brik brak ant de dimun ki coz de langaz diferan, ki sakenn pa conn langaz lot la apar omwin enn ladan ki conn enn de mo dan lot langaz la. Seki bann marsan laplaz e parfwa marsan bazar u sofer taxi servi pu cominik ar etranze li enn pidjin.

Enn patwa se enn variant rezional enn langaz. Si Quebec ti fer parti LaFrans, Franse Quebecwa ti pu kapav defini kuma enn patwa. Mem zafer dan Moris, sipoze ti ena enn parti Moris- dizon dan district Savanne- kot buku mo seki leres Moris servi inn deforme conpletman, langaz zot coze [dan Savanne] la ti pu enn patwa. Kreol coz parey partu dan Moris, donc patwa Kreol Morisien pa ekziste.

Enn cominote [ras] dominan kapav kalifie langaz enn lot cominote kuma dialect. Se zis enn atitid. Kan enn dimun kalifie so prop langaz kuma dialect, sa vedir li ena complex inferiorite par rapor ar enn lot [dan ka Morisien ar bann blan, bann Franse]

Langaz Kreol se langaz bann Kreol [cominote Kreol]

Laplipar bann Kreol coz zis Kreol, apar seki coz osi Angle u Franse. Sa pa vedir ki langaz Kreol apartenir a cominote Kreol. Si bann Kreol conn coz- nu kapav dir- zis Kreol se dabor akoz akiltirasion ki dat depi lepok esklavaz, me osi parski bann guvernma siksesif pa'nn turv lokazion met otan lintere ek larzan dan seki Afriken ki dan seki Aziatik. Bann langaz ansestral bann Kreol se Sakalava, Makhuwa, Chinyanja ek osi Wolof. Langaz Kreol se enn langaz Morisien ki'nn pran nesans e inn devlope dan Moris e ki apartenir a tu Morisien .

Kreol se donc enn langaz e se langaz tu Morisien e pa langaz enn cominote partikilie. Ekrir Kreol pa enn nouvo nide. Depi plizier banane tu bann lanket lapolis transkrir an Kreol. Bann lezot departman, kuma Biro Travay, osi fer zot bann lanket an Kreol; Minister Lasante pibliye so bann panfle pu inform lor bann diferan maladi an Kreol e sa donn bann rezilta. Tulezur 1.2 milion dimun servi Kreol dan zot lakaz, dan lakur lekol, dan lopital, dan biro, dan bis, ninport ki cote, ninport ki landrwa.

Alor kuma zot kapav ena dout sipa seki zot pe coze la se enn langaz?