Longanis, traitair, sorselri, diab, magi nwar problem superstysyon dan moris

Buku morisien extra superstysye – zot kwar dan longanis et zot panser ki ban la pou kapav rezurd zot ban problem ki zot p geyner. Ou kapav panser ki nek ban dimun ki pena ledykasyon ki pou tom victim ban trik kumsa mai ena tou sort kalite dimun depi nimporte ki kominote et nimporte ki nivo dan societe ki kwar ladan. Pa panser ki si sa dimun la avoca ou soi p roule dan enn bel baniol, ki li pa kwar ladan; ou pou geyne sok ou mem!

Pou sa travay longanis la, pa bizin ena bel sertifica sa – ou nek bizin koner kuma couyonne dimun pou bez zot cass. Ena bel lamonai ladan ek bien tigit depans. Ou bizin 2 paket cart, enn bobin difil nwar, imper zeroff, sandal ek camphr. Dan moince ki rs200, ou kapav geyn sa ban zafer la ek si ou resi konvainc ou premie klian, ou kapav geyn rs10,000 (enn profi rs9800). Enn zoli lamonai, non?

Akoz mentalite buku morisien ek superstysyon ki dimun encourazer depi lenfans, enn traler dimun vilnerab tourne vers traitair pou sorti dan problem. Nek panser ou mem letan ou ti tipti, ki ban superstysyon ou fine tander – si ou laiss seveu larger apre 6hr, diab pou rent ar ou, bisin pa taille zongle apre enn certaine ler, kan retourner aswar, bisin rente par ledos, ou soi bizin met sou-vetman enba laho. Ban superstysyon la vine pli konkre letan ou truv lor lacroizer, coco-banan, cass ek ena foi pizon mort tou. Dan simitiere kot grande-croix, pli bezer enkor – kok ki fine fer sacrifis, disang, foto dimun etc.

Ena dimun vraimem kroir dan sa ban zafer la. Si zot loto enpan la, zot dir dimun ine met lizie lor zot, alor bizin get longanis pou tir sa ban soy la. Si zot kontan enn dimun mais dimun la pa kontan zot, zot pou al kot traitair pou fer dimun la kontan zot. Nimport ki malsans ki ariver ou pou nimport ki pretex, dimun al donn zot cass longanis. Si longanis vraimem ti ena kit pouvoir, kifer la pa servi sa pou geyn lecourse ou loteri? Kifer li bizin fatig so latet ar problem lezot dimun? Pa penser ki li p fer sa pou aide dimun parski si vraimem li envi aide ou, li pou fer sa san deman cass.

Mentalite la pa pou sanzer sa; tanq ki dimun contign kwar dan malgas (ekrir nom dimun zot envi fer ditor lor kapsil apre al kouloute sa lor pied tamarin), dahine (kokin tibaba), diab (al ramas later simitiere kot dimun ki fine fek enterer) ek contign nuri minis-prince ar sardine, cigarette ek rum, ban longanis pou vine pli riss.

Si ou kone kit superstisyon ki ban finn mentioner dan sa lartik la ou soi ou ena lexperians dan sorcelri/magi nwar, partaz sa ek nou dan komentair enba., mersi.